Om

“reklamedama” i Granvin

L. J. Aga Reklame

Akkurat no les du om meg. Eg heiter Liv Jorun Aga og driv eit lite reklamebyrå som heiter L.J. Aga Reklame.
Eg held til i Granvin i Hardanger, og dei fleste kundane mine kallar meg for “Reklamedama i Granvin”.

Kundane mine er lokale verksemder (dvs. Hardanger og Voss) som treng hjelp til å laga logo, brosjyre, etikettar, heimeside, annonser, plakatar, bilreklame m.m.
– Dessutan fungerer eg ofte som diskusjonspartner og rådgjevar innan marknadsføring, sidan dei færraste av kundane mine har eigen “pr-sjef”.

Eg har jobba med reklame og design i nokre år.

Kort samandrag: Eige firma innan reklame og design i Granvin sidan 1996, LJAga Reklame. Før 1996 jobba eg i Oslo: Eige firma innan produktlansering og arrangement. AD og AD-assistent i Myres Lintas Reklamebyrå, Oslo. Utdanning: NMH- Norges Markedshøyskole, -markedskommunikasjon. Oslo Tegne- og Maleskole. Kunstskolen i Stavanger m.m.

Kundane mine er Heltane mine.
Eit par av heltane mine, Ekta Skåramat: Steinar og Aslaug Skår. På fjellgarden Skår i Granvin. Her i ein reportasje i vekebladet “Hjemmet” 2018.

Eg heiar på kundane mine. – Folk som kastar seg ut i det og satsar alt på eige firma. Dei som jobbar ræva av seg for ein ide dei har, eit produkt dei har tru på, noko dei brenn for.

Eg er fan av distrikta, småbedrifter og lokale verksemder. “Elefantsjuka” er ikkje mi greie. Eg tilstår at eg er svak for ekta og originale produkt, gode produkt, tradisjonsmat, rare ting og originale tenester. Eg er og oppteken av “dumpsterdiving”, hekta på gjenbruk (skrotnisse) og fornuftig bruk av ressursar. (Men gamle datamaskiner likar eg ikkje…).
Dessutan er eg samd med Kari Bjørke og Ivar Åsen i at Nynorsk er kjekt.

HEIMATT TIL GRANVIN ETTER 15 ÅR I OSLO
flytt til granvin, innside
Brosjyre flytt til Granvin, innsida ser slik ut. Alle foto er lånt frå velvillige Gravensarar. Klikk for større bilete.

Etter 15 år i Oslo flytta eg  -under tvil-  heimatt til Granvin og etablerte kontor i det gamle gardshuset.Tvilen var naturlegvis: kva skal eg jobba med?
Far min meinte at det var ikkje noko problem, det var berre å starta opp for seg sjølv med det eg kunne. -Så eg let det stå til.

Då eg fekk skrudd saman skrivebordet og plugga inn macen var det neste å skaffa kundar. Annonsa under “rykka eg inn” i lokalavisa “Hordaland”.

Tittel: FLYKTNING TRENG OPPDRAG!

– Responsen let ikkje venta på seg.

Dette er første annonsa eg rykka inn i avisa Hordaland for mitt eige firma. Den funka over all forventning!

Kva skjedde?Jau, det vart intervju med lokalavisa og diverse andre blad og aviser.NRK-radio dukka opp, stemma mi kom på radioen… eg fekk friarpost…- men best av alt, eg fekk ei røys med kundar!
Ikkje minst Granvin herad som melde seg som kunde nesten frå første dag og gav meg kjekke oppdrag. God drahjelp, kjekke folk og god kunde!

Året etter laga eg ny annonse og ein flygar (postkort) med nytt bodskap:

BONDETUPPE LEDIG FOR NYE OPPDRAG
Dette er ein flygar (postkort) eg laga nokre år etter annonsa med “flyktning”. I tillegg laga eg i annonse med samme bodskap.

 

Annonse og flyger gav godt resultat:Ei ny røys med kundar, fleire journalistar dukka opp på intervju (og dei obligatoriske friarbreva).

Flygaren (postkortet) sende eg deretter ut sånn dann og vann pr. post, og brukte den som visittkort. Og NEI, “Facebook” var ikkje oppfunne på den tida, “Internett” var fremmedord for dei fleste. Gode gamle Posten gjorde jobben då.

Kvifor Granvin?
flytt til granvin framside
Framside av brosjyre “flytt til Granvin”

Granvin er mitt “Barndommens rike” i Hardanger.
Eg kjem frå ein liten gard i Granvin. Med andre ord ei ekta bondetuppa. Då eg var liten hadde me kyr, sauer og frukt. Og mange kattar. Mammo og besten sette garn i Granvinsvatnet og fiska aure. Me ungane bada og herja i vatnet og skremde fisken. Pappen og besten dreiv i skogen med ved og tømmer. Foreldra mine dreiv bilverkstad. Besten og besto starta campingplass på 60-talet, då dei var godt vaksne. Her fekk me ungane testa ut både service-genene og nytt snop. Etter ungdomsskulen flytta eg heimanfrå og budde eit par år på hybel på Voss, deretter nokre år i Stavanger, og 15 år i Oslo.

Verktøykassa mi:

I tillegg til papir, penn og blyant nyttar eg Adobe: InDesign, Illustrator, Photoshop, Acrobat. Til fontstyring (kontroll av skrifttyper) nyttar eg Suitcase, Til heimesider WordPress av og til Dreamweaver.
Til alt det andre Filemaker og diverse andre program (appar).

“Hjelp” – seier du: Brukar ikkje dama “Word“, “Powerpoint” og “Excel”?
– Ingen fare. Eg tek mot alle filtypar utan problem.
I praksis er eg både designer og datanerd.

ooops

 

 

 

PS: kvifor det er bilder av meg overalt? Bilder av meg sjølv kan eg herpa som eg vil utan å spørja om lov 🙂

 

 

Du finn nokre av oppdraga eg har utført på skryteveggen, i tilfelle du er nysgjerrig. Lett blanding av nye og gamle. Eg legg ut fleire oppdrag etterkvart.- Dagens info kjem på bloggen min, inspirasjon. Når eg får inspirasjon.